Seguidores e seguidoras

viernes, 12 de abril de 2013

Primeiros Acrocephalus

Esta manhá achegava-me de novo até a lagoa de Valdovinho. Coincidia coa preamar, assi pois a lagoa mantinha un nivel alto de auga, que foi baixando pouco a pouco. Antes passei polos prados de Taraça, onde surprendim umha parelha de Faisáns que nestas alturas deixam-se ver davondo.


 Aproveitei para fotografar a pegada da espécie. Destaca o dedo central do pe (a pegada era algo maior ca da galiña).


Faisám comúm (Pashianus colchicus), macho

   Já na lagoa, aginha aparescérom as duas Águias pescadoras. A primeira, adulta, logrou captura no primeiro intento, coma sempre. Desta volta foi "almorçar" cara o monte do Oeste, repoboado con Eucaliptos e Pinheiros.
  Logo entrou a outra, um ejemplar jovem (ou semelha-o, pola plumagem do lombo). Neste caso, tentou unha e outra vez pescar algo, sem êxito. Nom sei se o vento do SW ou a crecida dos ríos pola chuvia destes dias, dificultavam a vissom do peixe, pero nunca vira tantos erros continuados. Espero que a falta tan notável de acerto nom se deva a algumha lessom desta águia.



Águias pescadoras (Pandion haliaetus)

   De aquáticas, pois sem moita novidade. Seguem por acô os Patos cristados americáns (Aythya collaris) e detectava o canto insistente da primeira Folosa das canaveiras (Acrocephalus scirpaceus) da temporada.
  A observaçom do dia dérom-ma um grupo de quatro Porcos bravos, que andavam pola riveira noroeste da lagoa, perto das dunas. 


  Fórom vindo pola beira, ata que decidírom dar-se um banho.


  Este animal é certamente moi anfibio na Frouxeira. Nom tem reparo nenhúm  em atravessar a lagoa de lado a lado (e som 500 metros).



  Na zona situada entre o "Lago pequeno" e a "Baía da lontra" tomárom terra e se internárom entre a canaveira, á busca de ninhos de aquáticas. Porque estamos em plena temporada de cría de aquáticas e nom som poucos os ninhos que destrúe este mamífero omnívoro.

Porcos bravos (Sus scrofa)

  Por último, graças a umhas Gaivotas patimarelas que acossavam algo na auga, descobrim umha família de Lontras (Lutra lutra). Umha fémia com dous cachorrinhos. Quiçá a mesma família que vira o outro dia com Fernando Pereiras, aínda que daquela só avistáramos um cachorro.


  Vémo-nos!

No hay comentarios:

Publicar un comentario

Para comentar es necesario identificarse con nombre y apellidos